>
>
>
Sulitin ang Pasyalan! 5 Pinakamagandang Lugar na Dapat Bisitahin sa Kawaji Onsen at Paligid Nito

Sulitin ang Pasyalan! 5 Pinakamagandang Lugar na Dapat Bisitahin sa Kawaji Onsen at Paligid Nito

Asya
2025.02.28
13 views

Ang Kawaji Onsen ay isang tahimik na hot spring resort na matatagpuan sa pinagtagpong bahagi ng Ojika River at Kinugawa River. Natuklasan ito noong 1723 matapos ang isang pagbaha sa Ojika River na nag-ukit sa lupa at naglantad sa likas na bukal ng mainit na tubig. Kilala ito sa pagpapagaling ng sugat, na siyang dahilan ng kasabihang: “Para sa sugat, Kawaji; para sa paso, Taki.”

Isa sa mga tampok ng lugar ay si Kawajii, isang masiglang maskot na may alam sa lahat tungkol sa Kawaji Onsen. Bukod sa mainit na tubig na nakakapagpagaling, napapalibutan din ang lugar ng mayaman na kalikasan, kaya't maaari kang mag-relax at magsaya sa iba’t ibang aktibidad!

Narito ang 5 pinakamagandang pasyalan sa Kawaji Onsen at paligid nito na hindi mo dapat palampasin.

Itago ang Talaan ng Nilalaman

Sulitin ang Pasyalan! 5 Pinakamagandang Lugar na Dapat Bisitahin sa Kawaji Onsen at Paligid Nito

1. Kawaji Onsen Town

Ang Kawaji Onsen Town ay isang tahimik at tradisyunal na hot spring village sa baybayin ng Ojika River, na may humigit-kumulang sampung ryokan at onsen inns. Isa sa mga pangunahing atraksyon nito ay ang "Yakushi no Yu", ang natural na bukal na sinasabing pinagmulan ng mainit na tubig sa Kawaji Onsen. Makikita rin dito ang "Onade Stone", isang sagradong bato na pinaniniwalaang nagbibigay ng swerte sa pagkakaroon ng anak at matagumpay na relasyon kapag hinaplos at ipinagdasal. Dahil dito, dinarayo ito ng maraming turista.

Sa pasukan ng Kawaji Onsen Town, makikita ang bantayog ni "Kawajii", ang mascot ng bayan. Sa loob ng Kawaji Fureai Park, maaari kang mag-relax sa "Musubi no Yu", isang open-air footbath, o sa mas malawak at may bubong na "Kawajii no Yu". May mga pahingahan malapit sa lugar, kaya perpekto itong hintuan habang naglalakad sa tabing-ilog.

Huwag palampasin ang "Fish Catching Experience" tuwing tag-init (huling bahagi ng Hulyo hanggang huling bahagi ng Agosto). May diskwento para sa mga bisitang tumutuloy sa Kawaji Onsen, at libre ang pagsali para sa mga batang wala pang edad pampasok sa paaralan! Ang nahuling isda ay maaaring ihawin at kainin ng sariwa sa mismong lugar.

Pangalan: Kawaji Fureai Park
Lokasyon: 45 Kawaji Onsen Kogen, Lungsod ng Nikko, Prepektura ng Tochigi
Opisyal na Website: https://www.city.nikko.lg.jp/hujiharakankou/kankou/kawazi/onsen/hureaikouen.html

2. Ryuokyo Gorge

Ang Ryuo Gorge (Ryuokyo) ay isang kahanga-hangang likas na tanawin sa Prepektura ng Tochigi na nabuo humigit-kumulang 22 milyong taon na ang nakalipas dahil sa aktibidad ng bulkan. Sa paglipas ng panahon, hinubog ng ilog Kinu ang matigas na batong bulkaniko, na lumikha ng matatarik at malalalim na bangin. Tulad ng isang naghahalinhinang dragon, ang makitid na lambak na ito ay may habang 3 kilometro. Isa ito sa mga pinakasikat na destinasyon sa Kawaji Onsen at tanyag din bilang isang natatanging lugar para sa tanawin ng taglagas (autumn foliage).

Ang lambak ay binubuo ng tatlong bahagi ang Hakuryu Gorge (Puting Dragon Gorge), Seiryu Gorge (Asul na Dragon Gorge) at Shiryu Gorge (Lilang Dragon Gorge).

May kanya-kanyang hiking trail ang bawat zone na may mga kilalang tanawin gaya ng Nijimi Falls, kung saan makikita ang bahaghari sa maaliwalas na araw, Ryuo Shrine, isang dambana na nakatalaga sa tagapangalaga ng lambak, at ang Iwa-no-Hara, isang malawak na batuhang patag na perpekto para sa pamamasyal. Depende sa pisikal na kakayahan, maaaring pumili ng hiking course na angkop sa iyo.

Kung nais mo ng maikling lakad, subukan ang 60-minutong ruta patungo sa "Shiraiwa," ang huling bahagi ng lambak, kung saan matatanaw ang kahanga-hangang tanawin ng kalikasan sa bawat panahon. Para sa mahilig sa matagalang hiking, inirerekomenda ang 6-kilometrong ruta patungo sa Kawaji Onsen Iwaburo, na tinatayang matatapos sa loob ng 3 oras.

Pangalan: Ryuokyo Gorge
Lokasyon: 1357 Fujiwara, Lungsod ng Nikko, Prepektura ng Tochigi
Opisyal na Webiste: http://www.ryuokyo.org/index.html

3. Kawaji Dam

Kung mahilig ka sa mga dam, siguradong magugustuhan mo ang Kawaji Dam sa Kawaji Onsen. Inabot ng 13 taon ang pagtatayo nito upang maiwasan ang pagbaha sa ilog at matugunan ang pangangailangan sa patubig ng mga sakahan. May taas na 140 metro, ang eksena ng bumubuhos na tubig mula rito ay tunay na kahanga-hanga. Sa katunayan, ito ang pang-apat na pinakamataas na arch concrete dam sa Japan.

Malapit sa Kawaji Dam, may museo at kainan kung saan pwedeng subukan ang sikat na Kawaji Dam Curry. Ang kakaibang putaheng ito ay ginawang kamukha ng dam gamit ang arch-shaped na kanin, habang ang curry ay may kasamang gobo (burdock) at carrots mula sa Nikko. Kapag umorder ka ng curry na ito, makakakuha ka rin ng Dam Card bilang pasalubong!

Para sa mga mahilig sa adventure, may canoeing at kayaking sa paligid ng Kawaji Dam, isang patok na summer activity sa Kawaji. May propesyonal na instructors para sa mga baguhan, kaya ligtas itong subukan ng kahit sino. Maaari ring isama ang iyong alagang aso, kaya siguradong mas masaya ang pamamasyal kasama ang iyong fur baby!

Pangalan: Kawaji Dam
Lokasyon: 319-6 Kawaji Onsen, Lungsod ng Nikko, Prepektura ng Tochigi
Opisyal na Website:http://www.ktr.mlit.go.jp/kinudamu/index.html

4. Ozasa Ranch

Mula sa Kawaji Onsen, dumaan lamang sa Prefectural Road 169 upang marating ang Ozasa Ranch, isang kamangha-manghang tanawin sa Nikko National Park. Matatagpuan sa taas na 1,300 metro, mula rito matatanaw ang buong Kanto Plain.
Para sa mga mahilig sa hayop, mayroong Fureai Plaza, kung saan maaaring makipaglaro sa mga kambing, tupa, kuneho, at miniature horses. May pagpapakain ng hayop at pagsakay sa kabayo. Para naman sa mga pamilya na may maliliit na bata, may Wanpaku Plaza na mayroong playground, go-kart, at sledding area para sa masayang karanasan.

Huwag palampasin ang mga dairy experience tulad ng pag-gawa ng mantikilya at ice cream. Bagaman hindi maaaring iuwi ang mga produkto dahil sa mga regulasyon sa kalinisan, puwede itong tikman agad pagkatapos gawin. Wala rin itong age restriction, kaya magandang aktibidad para sa buong pamilya!

Sa loob ng Rest House, may mabibili ring eksklusibong dairy products na gawa sa Brown Swiss milk, isang espesyalidad ng Ozasa Ranch. Huwag ding palampasin ang Brown Swiss Milk Soft Cream, isang natatanging sorbetes na matitikman lamang dito.

Pangalan: Ozasa Ranch
Lokasyon: 3405 Seo, Ozasa Hara, Lungsod ng Nikko, Prepektura ng Tochigi
Opisyal na Website:https://www.nikko-ozasa.jp/

5. GRANDE ISOLA

Maraming tao ang magugulat na may kart racing circuit sa ganitong lugar! Ang GRANDE ISOLA ay isang go-kart racing track na matatagpuan malapit sa Kosagoe Station sa Tobu Kinugawa Line, napapalibutan ng nakama manghang tanawin ng kalikasan. Ang circuit ay may 365 metrong haba bawat ikot, kung saan maaaring magkarera gamit ang go-karts at subukan ang bilis ng kanilang lap time. Isang madaling at masayang aktibidad na angkop para sa lahat ng edad, mula bata hanggang matanda!

Walang kailangang dalhin na kagamitan, at pwedeng maglaro kahit umuulan! Dahil sa pagiging walang-abala nito, isa ito sa mga paboritong destinasyon ng mga turista, lalo na tuwing maaraw na weekend. Mayroon itong computerized timing system na sumusukat ng oras hanggang 0.001 segundo, kaya naman talagang mararamdaman mo ang totoong racing experience. Kung mahilig ka sa bilis o gusto mo lang ng aktibong libangan, ito ang perpekto na lugar para ilabas ang iyong inner F1 racer!

Pangalan: GRANDE ISOLA
Lokasyon: 333 Kosagoe, Lungsod ng Nikko, Prepektura ng Tochigi, Japan
Opisyal na Website: http://www.grandeisola.com

Buod

Ang Kawaji Onsen ay puno ng masasayang aktibidad na napapalibutan ng kalikasan. Matapos ang adrenaline-filled karting adventure, maaari kang mag-relaks at mag-recharge sa malapit na mainit na bukal. Kung nais mong palawakin pa ang iyong paglalakbay, pumunta sa sikat na Kinugawa Onsen, na nasa malapit lang, para ma-enjoy ang tanawin, mainit na bukal, at mga mga pasyalan. Samantalahin ang pagkakataong ito upang maranasan ang isang natatanging pakikipag-ugnayan sa kalikasan na hindi mo madalas mararanasan sa pang-araw-araw na buhay!

Inirerekomenda para sa Iyo!

Asya Mga inirerekomendang artikulo

Asya Mga inirerekomendang artikulo