Lungsod ng Kuwana: Isang Destinasyon ng Turismo 30 Minuto Lamang mula sa Nagoya! Sampung Inirerekomendang Lugar na Dapat Bisitahin

Matatagpuan sa hilagang bahagi ng Prepektura ng Mie, ang Lungsod ng Kuwana ay madalas na itinuturing na pasukan mula sa Nagoya, dahil matatagpuan ito sa kabilang panig ng Ilog Kiso mula sa Prepektura ng Aichi. Gayunpaman, marami ang maaaring dumaan lamang sa Kuwana habang papunta sa sikat na Ise Grand Shrine, hindi namamalayang mayroon din itong sariling mga natatanging atraksyon.
Sa katunayan, isa ito sa nangungunang destinasyon sa Prepektura ng Mie, kung saan matatagpuan ang mga makasaysayang pasyalan, iba't ibang leisure facilities, at masasarap na lokal na pagkain. Noong unang panahon, ang Kuwana ay isang masiglang bayan ng pahingahan sa Tokaido route, ngunit sa kasalukuyan, ito ay naging isang maunlad na tirahan para sa mga nagko-commute sa Nagoya, na dinarayo ng maraming turista sa buong taon.
Ngayong taglagas, tuklasin ang mga nakatagong yaman ng Lungsod ng Kuwana! Kung madalas mo itong nilalampasan papunta sa Nagoya o Ise-Shima, o kung hindi mo pa talaga natutuklasan ang Prepektura ng Mie, ito na ang tamang pagkakataon para bisitahin ito. Libutin ang kagandahan ng Kuwana at gawing susunod mong destinasyon!

1. Tadotaisha Shrine: Dapat Bisitahin Kasama ng Ise Jingu

Ang Ise Jingu, kilala rin bilang "O-Ise-san," ay isa sa pinakasikat na dambana sa Japan. Sa lungsod ng Kuwana, matatagpuan ang isa pang mahalagang dambana na may kaugnayan sa Ise Jingu—ang Tadotaisha Shrine. Ipinagdiriwang dito ang pangatlong anak ng Amaterasu Omikami, ang pangunahing diyos ng Ise Jingu.
Tinatawag ding "Northern Ise Grand Shrine," ang Tadotaisha ay may mahabang kasaysayan ng pagiging isang banal na lugar. May kasabihang, "Kapag dumalaw ka sa Ise, kailangan mo ring pumunta sa Tado. Kung hindi, hindi kumpleto ang iyong peregrinasyon." Napapaligiran ng luntiang kalikasan, ang tahimik at sagradong kapaligiran nito ay nagbibigay ng payapang karanasan sa mga bumibisita.
Bukod sa pananampalataya, ang Tadotaisha Shrine ay isang perpektong lugar din para sa pagpapahinga. Tuwing taglagas, ginaganap dito ang Yabusame Festival na dinarayo ng maraming bisita. Malapit dito ang Bundok Tado, na may isang parke sa tuktok kung saan matatanaw ang kahanga-hangang tanawin ng Ise Bay. Mayroon itong 3.5 km hiking trail, kaya maraming bumibisita rito pagkatapos ng pagbisita sa dambana.

2. Nagashima Resort

Matatagpuan sa Nagashima Onsen, ang Nagashima Resort ay tahanan ng ilan sa pinakamalaking pasyalan sa Japan. Isa na rito ang Nagashima Spa Land, isa sa pinakamalaking amusement parks sa bansa, na may Guinness World Record-certified na rides at isang napakalawak na water park tuwing tag-init.
Isa pang dinarayo sa resort ay ang Nabana no Sato, isang malawak na hardin kung saan matutunghayan ang nagbabagong tanawin ng kalikasan ayon sa panahon at isa sa pinakamahusay na illuminations sa buong mundo, na dinadayo ng mga turista mula sa iba’t ibang panig ng Japan. Matatagpuan din dito ang Jazz Dream Nagashima, isa sa pinakamalaking outlet malls sa Japan, at ang Nagoya Anpanman Children's Museum & Park, na paborito ng mga pamilya.
Isa sa pinakainaabangang bahagi ng Nagashima Resort ay ang onsen o mainit na bukal nito. Ang "Yuami no Shima" ay isa sa pinakamalaking hot spring facilities sa Japan, na may opsyon para sa overnight stays o day-use. Isa itong kumpletong destinasyon para sa pahinga, shopping, at entertainment para sa lahat ng edad. May mga direktang bus mula sa Nagoya para sa madaling pagbiyahe, at maraming event ang ginaganap sa buong taon kaya’t marami ang bumabalik dito.

3. Shichiri no Watashi

Ang Shichiri no Watashi ay isang mahalagang daanan para sa mga peregrino patungo sa Ise Grand Shrine. Ang pangalan nito ay nagmula sa pitong ri (humigit-kumulang 27.5 km) na distansya ng paglalakbay sa bangka mula Atsuta, Miya-no-Watashi sa Nagoya, hanggang sa pantalan ng Kuwana. Bilang ika-42 na istasyon sa rutang Tokaido, umunlad ito bilang mahalagang himpilan ng mga biyahero patungong Ise. Sa lugar na ito matatagpuan ang "Ise Province First Torii Gate," isang simbolikong pasukan sa sagradong paglalakbay.
Marami ang maaaring nakapanood sa balita tungkol sa Shikinen Sengu, ang tradisyunal na muling pagtatayo ng Ise Grand Shrine tuwing ika-20 taon. Ngunit hindi lang ang mismong dambana ang naitatayo muli—kasama rin ang torii gate na ito, na nagpapakita ng kahalagahan nito sa paglalakbay patungong Ise. Sa paligid, makikita ang mga makasaysayang palatandaan tulad ng Joya-to (mga ilaw sa gabi), Toki no Kane (kampana ng oras), mga pinagtibay na lansangan na may nakatayong puno ng pino, at mga lumang bahay na nagpapakita ng tanawin noong sinaunang panahon. Isang mainam na paraan upang maranasan ang kasaysayan at kalikasan ay ang paglalakad sa tabi ng tahimik na Ilog Kiso habang nilalasap ang sariwang simoy ng hangin.

4. Tado Green Farm

Isa sa mga hindi gaanong kilalang pero sulit puntahang destinasyon sa Kuwana ay ang Tado Green Farm, kung saan pwedeng maranasan ang pag-aani ng sariwang prutas at gulay ayon sa panahon. Isa sa mga pinakasikat na aktibidad dito ay ang strawberry picking! (Kinakailangang magpareserba, at may off-season kaya siguraduhing alamin muna bago bumisita.) Dahil nasa loob ng greenhouse ang taniman, hindi ito apektado ng panahon, kaya't pwedeng mag-enjoy kahit umuulan.
Mayroon ding malawak na barbecue area na may bubong at berdeng damuhan, kung saan ligtas makakapag laro ang mga bata. Para sa mas madaling karanasan, may Omakase Tebura Course kung saan naka-ready na ang lahat, pati na rin ang Girls' Party Course, na patok sa mga bisita. May café at tindahan din sa loob ng farm, kaya't perpektong stopover ito para sa mga biyahero. Huwag palampasin ang pinakakilalang pasalubong ng farm—ang Ichigo Roll, na gawa sa kanilang sariwang strawberry!

5. Isang National Important Cultural Property! Tuklasin ang Kasaysayan ng Rokkaen

Idinisenyo ng British architect na si Josiah Conder, na tanyag sa kanyang obra maestra na Rokumeikan, ang Rokkaen ay isang mahalagang makasaysayang gusali na kinilala bilang National Important Cultural Property. Matapos ang pagkakumpleto nito noong Taisho 2 (1913), nananatili nitong pinangangalagaan ang orihinal nitong anyo, kaya’t ito ay isang bihirang halimbawa ng arkitekturang sumasalamin sa panahon ng Taisho. Ang pinaka kahanga-hangang aspeto ng Rokkaen ay ang perpektong pagsasanib ng arkitekturang Kanluranin at Hapon, na makikita sa Western-style mansion, tradisyunal na Japanese-style na bahay, mga bodega, at hardin. Ang kahanga-hangang kagandahan nito, na para bang mula sa isang klasikong pelikula, ay siguradong humipo sa damdamin ng mga tao noong panahong iyon.
Ang pagsasama ng kulturang Kanluranin at Hapon sa disenyo ng Rokkaen ay nagpapakita ng pagmamahal ni Josiah Conder sa parehong Japan at United Kingdom. Matapos ang isang renovation noong tag-init ng 2014 (Heisei 26), mas pinaganda pa ang gusali. Maaari ring mag-enjoy ang mga bisita ng masarap na pagkain sa isang kalapit na restawran habang pinagmamasdan ang napakagandang tanawin ng Rokkaen.

6. Paboritong Destinasyon ng mga Lokal: Kyuka Park & Chinkoku Shukoku Shrine

May lawak na humigit-kumulang 7.2 ektarya, ang Kyuka Park (Kyuka Kōen) ay itinayo sa dating Honmaru at Ninomaru ruins ng Kuwana Castle. Ang pangalan nitong “Kyuka” ay hango sa “Kuwana,” isang makasaysayang katawagan para sa lungsod.
Isa sa mga tampok na atraksyon dito ay ang Kuwana Suigo Boat Tour, kung saan maaaring mamasyal nang mapayapa sa palibot ng moat na bumabalot sa 60% ng parke. Partikular itong sikat tuwing tagsibol, kapag namumukadkad ang mga cherry blossoms. Tuwing Abril, ginaganap ang Sakura Festival, habang tuwing Mayo naman ay ang Azalea Festival, kasama ang iba’t ibang seasonal events na nagbibigay kasiyahan sa mga bisita at lokal.

7. Gumawa ng Natatanging Pasalubong sa "Ando Food Sample Workshop"

Kahit tayong mga Hapon ay namamangha sa kalidad ng mga food sample ngayon! Ang teknolohiyang ginagamit sa Japan upang lumikha ng mga sobrang makatotohanang replica ng pagkain ay talaga namang world-class. Kaya hindi na nakapagtataka na ito ang paboritong pasalubong ng mga dayuhang turista! Minsan, napagkamalan ko pang totoong pagkain ang isang sample at sinubukan ko itong hawakan—pero ibang kwento na ‘yan!
Sa Ando Food Sample Workshop sa Kuwana City, may kakaibang pagkakataon kang makagawa ng sarili mong food sample. Hindi araw-araw na may pagkakataon kang mag disenyo ng isang ultra-realistic na pagkain gamit ang sariling mga kamay! Pwede kang gumawa ng parfait, donut, at kahit sikat na Nagoya-style Tonteki (Tonkatsu Steak)—sobrang ganda para hindi i-post sa social media! Kung kasama mo ang mga dayuhang kaibigan o bata, siguradong mag-eenjoy sila sa hands-on na karanasang ito.
Huwag kalimutang bisitahin ang kanilang opisyal na blog, "Taberaremasen" (Hindi Pwedeng Kainin), para sa pinakabagong event updates at iskedyul ng workshop. Sulitin ang oportunidad na ito!

8. Magsaya sa Likas na Natural Pool ng Tadokyo Gorge

Ang Tadokyo Gorge ay isang perpektong destinasyon para sa mga mahilig sa kalikasan. Nagpapalit ito ng anyo ayon sa panahon—berdeng-berde sa tagsibol at nagiging isang napakalinaw na natural na swimming pool sa tag-init. Hindi tulad ng karaniwang swimming pool, ang tubig dito ay natural na pinapanatili ng agos ng ilog, kaya hindi na kailangang gumamit ng chlorine o iba pang kemikal. Isa itong paboritong lugar ng mga lokal na bata sa tag-araw, at nagbibigay ng kakaibang lamig at kasariwaan kumpara sa karaniwang swimming pools o dagat.
Kapag bukas ang swimming season, may iba't ibang seasonal events na ginaganap sa lugar. Sa taglagas (autumn), nagiging kaakit-akit ito dahil sa makukulay na dahon, at sa Hunyo, makikita ang mahiwagang fireflies na nagbibigay liwanag sa gabi. Huwag palampasin ang pagbisita sa Misogi Falls, isang 25 metrong taas na purification waterfall na may malalim na koneksyon sa Tado Shrine.

9. Waju no Sato – Isang Perpektong Destinasyon Para Matutunan ang Kuwana at Kultura ng Tubig!

Ang Kuwana, na matatagpuan sa tagpuan ng mga ilog ng Kiso, Nagara, at Ibi, ay isang lugar na madalas tamaan ng pagbaha. Dahil dito, nagkaroon ang mga lokal ng makabagong paraan upang mamuhay ng matiwasay sa kabila ng mga sakuna sa tubig. Isa sa mga natatanging kultura ng Kuwana ay ang "Waju"—isang epektibong sistema ng pamamahala ng tubig at pagpigil sa pagbaha. Para sa ating mga Pilipinong nakatira sa bansang napapaligiran ng dagat, may mahahalagang aral na maaaring matutunan mula sa diskarteng ito.
Sa Waju no Sato, maaari mong tuklasin ang kasaysayan, kultura, at industriya ng Kuwana, at alamin kung paano nila naingatan ang kanilang mga pamayanan mula sa pagbaha habang naninirahan malapit sa tubig. Bukod sa pagpapakita ng makasaysayang impormasyon, mayroon ding mga aktibidad na pwedeng salihan ng bata at matanda, tulad ng pagtanim at pag-ani ng pana-panahong gulay sa farm at ang paggawa ng nori gamit ang sariwang lumot-dagat mula sa bunganga ng ilog ng Kiso-Sanshō.
Kung naghahanap ka ng magandang proyekto para sa summer vacation, mainam ang pagbisita sa lugar na ito. Isa sa mga pinaka-kapanapanabik na karanasan dito ay ang Waju Miso-Making Workshop, kung saan maaari kang gumawa ng sarili mong bariles ng miso gamit ang lokal na bigas at soybeans.

10. Hamaguri PlazA – Tikman ang Preskong Inihaw na Hamaguri Clams Habang Tinatamasa ang Tanawin ng Ilog!

Itinayo noong 2010, ang Hamaguri Plaza ay isang sikat na destinasyon sa Kuwana na kilala sa nakamamanghang tanawin ng bunganga ng Ilog Ibi at Nagara mula sa observation deck. Bukod dito, mayroong eksibisyon na nagpapakita ng kasaysayan ng pangingisda sa Kuwana, kaya’t isang perpektong lugar ito para sa mga nagnanais matuto tungkol sa yamang-dagat ng lungsod. Bilang isang pampublikong gusali at pook-pasyalan, nagsisilbi rin itong mahalagang bahagi ng komunidad.
Isa sa mga pinakapinupuntahang bahagi ng Hamaguri Plaza ay ang restawran na "Hamakaze," kung saan maaaring tikman ang mga sariwang pagkaing-dagat na direkta mula sa pantalan ng Kuwana. Partikular na sikat sa mga turista ang "grilled Kuwana clams" na hinahain habang mainit at malambot pa mula sa ihawan. Dahil sa kasikatan ng "Grilled Hamaguri Set Meal," inirerekomendang magpareserba bago bumisita.
Bukod dito, maaari ring subukan ang mga seasonal na putahe gaya ng "Shirauo Don" (icefish rice bowl) na inihahain lamang tuwing maagang bahagi ng tagsibol, at ang espesyal na Ise Udon na may masarap na hinimay na hamaguri clams. Sa abot-kayang presyo, mararanasan mo ang tunay na sarap ng lokal na seafood ng Kuwana.

◎ Buod

Bagamat madalas mapansin ang Ise Jingu Shrine bilang pangunahing atraksyon sa Prepektura ng Mie, hindi rin dapat palampasin ang Kuwana, isang lungsod na punong-puno ng magagandang tanawin at aktibidad! Kilala bilang isang nangungunang destinasyon sa hilagang bahagi ng Ise, ang Kuwana ay may kombinasyon ng kalikasan, masasarap na pagkain, makasaysayang pasyalan, at mga paglalakbay na hindi mo matutuklasan sa isang araw lang!
Pero alam mo ba? Mula sa Nagoya, maaari mong marating ang Kuwana sa loob lamang ng 30 minuto sakay ng tren o 40 minuto kung magmamaneho ka—mas madaling puntahan kaysa sa inaakala mo! Dahil maraming pwedeng gawin para sa lahat ng edad, ang Kuwana ay isang perpektong destinasyon para sa isang family trip ngayong taglagas. Bakit hindi mo subukang tuklasin ang kagandahan ng Kuwana sa iyong susunod na bakasyon?

• FB
• Twitter

Inirerekomenda para sa Iyo!

Isang kumpletong gabay sa sikat na tourist spot ng San Francisco na “Fisherman’s Wharf”!

Ang Fisherman's Wharf ay isa sa mga pinakasikat na lugar na puntahan ng mga turista sa San Francisco. Mula sa isang abalang waterfront para ...

32 views

31 na mga pasyalan sa paligid ng Mt. Hakkoda sa Aomori Prefecture (Mula sa mga kilalang lugar hanggang sa mga natatagong hiyas, maraming makikita)

Ang lugar sa paligid ng Mount Hakkoda sa Aomori Prefecture ay puno ng mga inirerekomendang destinasyon, kasama ang mga scenic na rutang pant...

41 views

10 Pasyalan na Dapat-bisitahin na mga tourist spots sa Rovaniemi, ang lungsod ni Santa Claus

Rovaniemi, isang kamangha-manghang lungsod na matatagpuan sa hilagang bahagi ng Finland, ay kilala bilang opisyal na tahanan ni Santa Claus....

37 views

6 Inirerekomendang Mga Pasyalan sa Puebla, Mexico: Ang Lungsod ng Gourmet na Pagkain at Palayok

Matatagpuan humigit-kumulang dalawang oras ng biyahe sa bus mula sa Mexico City, ang Puebla ay isang pangunahing lungsod na kilala sa masasa...

12 views

Ang Huling Hangganan! Tuklasin ang Mga Kaakit-akit na Pasyalan ng Puerto Princesa!

Ang Palawan, isang mahaba at makitid na isla sa timog-kanluran ng Pilipinas, ay tahanan ng kabisera nitong Puerto Princesa. Ang pangalan na ...

20 views