8 Lugar na Dapat Bisitahin na Makasaysayang Pasyalan sa Kiryu

Narinig mo na ba ang pangalang Kiryu? Ang Kiryu, na matatagpuan sa silangang bahagi ng Gunma Prefecture, ay kilala bilang lugar kung saan ginagawa ang mga tela ng Kiryu. Sinasabing ang pinagmulan nito ay umaabot ng halos 1,300 taon na ang nakaraan, na may mahabang kasaysayan.

Sa Kiryu, na nagtataglay ng ganitong kahanga-hangang kultura, maraming makasaysayang lugar na maaaring tuklasin. Ang pagbisita sa Kiryu at pagdama sa payapang kapaligiran nito ay tiyak na makakapagbigay ng ginhawa sa iyong kaluluwa. Sa pagkakataong ito, ipakikilala namin ang walong dapat-bisitahing magagandang lugar sa Kiryu para sa iyong pamamasyal.

1. Houtokuji Temple

Ang Houtokuji ay isang Zen temple na nagtataglay ng higit 550 taong kasaysayan mula pa noong panahon ng Muromachi. Ang pangunahing gusali nito ay itinayo sa estilo ng “Hojo-style,” isang disenyo ng Zen sect na madalas gamitin noong panahong iyon, lalo na ng Rinzai sect. Ngayon, ang estilo na ito ay makikita na lamang sa ilang templo sa rehiyon ng Kanto, kaya’t ang Houtokuji ay isa sa mga hindi dapat palampasin kapag bumisita ka sa Kiryu.

Bukod sa kasaysayan, ang templo ay bantog din sa likas na kagandahan ng paligid nito. Tuwing Mayo, nagaganap ang Peony Festival, samantalang ang Autumn Leaves Festival ay idinaraos tuwing Nobyembre, na nagiging dahilan upang dagsain ito ng mga bisitang nais masilayan ang kagandahan ng kalikasan. Mainam ang pagbisita sa Kiryu sa mga panahong ito para sa isang di-malilimutang karanasan. Nag-aalok din ang templo ng Zen meditation experience, na ginagawa itong mas bukas sa publiko at madaling maunawaan.

Isang paboritong bahagi ng pagbisita sa Houtokuji ay ang pagkuha ng ilustradong goshuin (tatak ng templo). May ilang disenyo na eksklusibo sa limitadong panahon, at talaga namang nakakaaliw ang mga ito! Kapag nakakuha ka ng espesyal na edisyon ng tatak, ito’y magiging isang kakaibang pasalubong mula sa iyong pag bisita.

2. Natural Dyeing Research Institute

Ang Natural Dyeing Research Institute (Someiro) ay isang natatanging destinasyon para sa mga bisitang naghahanap ng kakaibang karanasan sa Kiryu. Bilang isang lungsod na kilala sa mahabang tradisyon ng paggawa ng tela, patuloy itong nagiging tahanan ng mga sining at paglikha. Sa institusyong ito, makikilahok ka sa mga workshop na pinamumunuan ng mga dalubhasa, mula sa paggamit ng natural dyes hanggang sa chemical dyes.

Isa sa mga tampok ng pagbisita ay ang pagkakataong lumahok sa mga workshops tulad ng plant dyeing at hand-weaving sa pamamagitan ng pag-reserba. Ang proseso ng pagpili ng kulay, pagpapakulo ng dye, at paggawa ng iyong obra ay isang masayang aktibidad. Bukod dito, ang mga gawa mong produkto ay maaaring maging espesyal na pasalubong mula sa iyong biyahe.

3. Hikobe House

Kung nais mong maranasan ang kasaysayan ng Kiryu, ang "Hikobe House" ang perpektong lugar para sa iyo. Isa itong tradisyonal na bahay Hapon na mahigit 400 taon na ang tanda. Itinanghal bilang Pambansang Mahalagang Pamanang Kultural, ito’y pag-aari ng isang pamilya na unang nanirahan sa lugar noong 1561. Nakakabilib na ang mga inapo ng pamilya ay naninirahan pa rin dito hanggang ngayon. Isa itong pambihirang pagkakataon upang makita ang kasaysayan na nananatiling buhay bilang isang tahanan.

Ang pagpasok sa pintuang may bubong na kugon ay parang paglalakbay pabalik sa nakaraan, sa isang panahon kung saan ang buhay ay mas tahimik at mabagal ang daloy. Sa loob, makikita mo ang mga yaman tulad ng puno na magkasamang tumubo, na idineklara bilang isang natural na monumento, at ang liham mula kay Yukichi Fukuzawa. Kapag napili mo ang tamang panahon ng pagbisita, maaari kang makaranas ng guided tour para mas maunawaan ang lugar.
Bukod dito, matatagpuan ito sa parehong linya ng mga kilalang Nikko Toshogu Shrine at Kunozan Toshogu Shrine, kaya itinuturing din itong isang power spot. Sa anumang panahon ng taon, tiyak na kahanga-hanga ang kagandahan ng bahay na ito, kaya’t isa itong atraksyong hindi dapat palampasin sa iyong pagbisita sa Kiryu.

4. Yotsuji no Saika

Para sa mga mahilig sa masarap na pagkain at makasaysayang lugar, ang Yotsuji no Saika ay ang tamang destinasyon sa Kiryu. Dating tirahan ni Saito Kappei, isang tanyag na personalidad sa industriya ng tela sa Kiryu, ang istruktura nito ay nagmula pa noong 1878 para sa imbakan at sa panahon ng Taisho para sa pangunahing bahay. Ang pagbisita dito ay parang paglalakbay sa isang bahagi ng kasaysayan.

Bagama’t kahanga-hanga ang arkitektura, ang talagang kaabang-abang ay ang kanilang dining experience tuwing weekend lamang. Maari mong tikman ang Okkirikomi Udon, ang tanyag na lokal na pagkain ng Gunma Prefecture. Ang malalapad nitong pansit na puno ng gulay ay inihahain ng mainit sa isang malaking palayok. Sinamahan pa ng inari sushi, ito’y isang nakabubusog at masarap na pagkain. Ang makasaysayang ambiance ng bahay ay magpapadama ng init sa iyong puso at magpapasaya sa panlasa.

5. Bakery Cafe Renga

Kapansin-pansin ang pulang ladrilyong pader at sawtooth na bubong ng Bakery Cafe Renga. Isa sa mga dapat bigyang pansin ay ang kasaysayan ng gusali nito. Dating isang pabrika ng paghahabi noong panahon ng Taisho, ito na ang natitirang sawtooth-roofed na ladrilyong pabrika sa Kiryu. Dinisenyo na may skylights para hayaang pumasok ang natural na liwanag, na mahalaga noon sa operasyon ng pabrika. Ang ideya ng simulan ang umaga sa ilalim ng liwanag na ito ay tunog nakaka enganyo—isang perpektong panimulang punto para sa iyong paglilibot sa Kiryu.

Sa loob ng makasaysayang gusaling ito, maaari kang magpakasaya sa iba’t ibang klase ng masasarap na tinapay. Ang maluwag at modernong interyor nito, na may mga upuang sopa, ay nagbibigay ng maginhawa at nakaka-relaks na karanasan. Sa dami ng pagpipiliang tinapay, siguradong makakahanap ka ng swak sa panlasa mo.

Isa pang nakakatuwang dagdag ay ang libreng supot ng mga pritong tinapay na may asukal. Mainam itong dalhin habang naglilibot. Matatagpuan ito sa tapat ng Yotsuji no Saika, kaya’t maaari mong bisitahin ang parehong lugar para sa dobleng saya sa pagpasyal.

6. Mizunuma Station Onsen Center

Isang mainit na bukal sa plataporma ng tren?! Ganito kahalaga ang istasyon ng Mizunuma sa Kiryu. Matatagpuan ito sa isang linya kung saan dumadaan ang isang trolley train sa piling mga araw. Maari kang mag-enjoy sa biyahe ng tren at sabay mag-relaks sa mainit na bukal—isang natatangi at nakakatuwang kombinasyon.

Ang bathhouse ay may malalaking bintana, kung saan makikita mo ang tanawin ng kabilang pampang ng Ilog ng Watarase at ang napakagandang luntiang paligid habang naliligo. Bukod dito, may ilaw na pantanda/senyas sa loob na paliguan na nagpapalit ng kulay bilang babala kapag paparating na ang tren—isang kakaibang detalye na hindi mo madalas maranasan. Isang perpektong lugar ito para bumaba at magpahinga saglit sa gitna ng iyong paglilibot sa Kiryu.

7. Kiryu Meiji-kan

Ang Kiryu Meiji-kan ay isang puting gusaling may arkitekturang Kanluranin na itinayo noong 1878 bilang Gunma Prefectural Hygiene Office. Kinilala ito bilang Mahalagang Pamanang Kultural ng gobyerno ng Japan, kaya't isang napakahusay na lugar upang maapuhap ang kasaysayan. Ang eleganteng istilo ng Kanluranin noong panahon ng Meiji ay minsang ginamit din bilang tanggapan ng barangay.

Sa loob, maaaring bisitahin ang mga silid-pulong, terasa, at mga natatanging eksibit tulad ng isang piyano mula sa panahon ng Meiji. Ang mga mahilig sa makasaysayang gusaling Kanluranin ay tiyak na magugustuhan ito. Bukod dito, pwedeng kumuha ng litrato dito, kaya’t isa itong magandang lugar upang mag-imbak ng alaala bilang turista.

Matatagpuan naman sa unang palapag ang café na nag-aalok ng masarap na kape at cake, habang sinasabayan ng tunog ng isang lumang gramopono. Napapaligiran ng mga antigong dekorasyon, maaari kang magpalipas ng oras na tila naglakbay sa panahon ng Meiji. Ang pagbisita dito ay tiyak na magbibigay ng kakaibang karanasan sa Kiryu.

8. Okawa Museum of Art

Sa Lungsod ng Kiryu, matatagpuan ang Okawa Museum of Art, isang lugar na paraiso para sa mga mahilig sa sining. Tampok dito ang koleksyong nakatuon sa modernong Japanese Western-style na pagpipinta, na tinipon sa loob ng 40 taon ng kilalang taga-Kiryu na si Eiji Okawa.

Ang museo ay idinisenyo na may maraming maliliit na silid-pang-ekshibisyon, na nagbibigay ng kakaibang karanasan na parang naglalakad sa isang maze. Ang bawat silid ay may mga komportableng sofa, kaya para kang nasa bahay habang pinagmamasdan ang mga sining. Perpekto itong lugar para sa mga naghahanap ng mapanatag at eleganteng karanasan habang naglalakbay.

Sa ikalawang palapag, matatagpuan ang tea room na nag-aalok ng mainit na inumin at magagaan na pagkain. Kahit hindi ka pumasok sa museo, pwedeng magpahinga sa tea room, kaya’t isa itong magandang destinasyon upang mag-relax habang nag-eexplore sa Kiryu.

◎ Buod

Sa gabay na ito, ibinahagi namin ang walong pinakamagandang destinasyon sa Kiryu. Mula sa mga makasaysayang istruktura hanggang sa mga kahanga-hangang tanawin ng kalikasan, tunay na sagana ang Kiryu sa mga atraksyon.

Bagama't nakakaaliw ang paglibot sa iba't ibang lugar, maaari ring mas maging kawili-wili kung magtutuon ka sa isang aspeto tulad ng paggalugad sa mga makasaysayang gusali, pagbisita sa mga templo at dambana, o pagsakay sa tren batay sa iyong hilig. Dahil napapalibutan ng likas na kagandahan ang Kiryu, ang tanawin ay nagbabago depende sa panahon, na siyang nagbibigay ng kakaibang ganda sa lugar. Tiyaking sulitin ang iyong natatanging karanasan sa pamamasyal sa Kiryu!