Magsaya sa Noboribetsu Onsen sa Isang Araw: 7 Rekomendadong Day-Use na Mainit na Bukal

Kapag binanggit ang Noboribetsu sa Hokkaido, ang unang pumapasok sa isipan ng karamihan ay ang Noboribetsu Onsen. Isa ito sa iilang lugar sa Japan kung saan maaaring maranasan ng mga bisita ang iba’t ibang uri ng mainit na bukal sa iisang lokasyon. Dahil sa kasaganaan ng mineral sa mga ito, maraming hotel at tradisyonal na ryokan ang matatagpuan sa Noboribetsu Onsen Town.
Kung bibisita ka sa Noboribetsu Onsen, bakit hindi mo sulitin ang pagkakataon at subukan ang iba’t ibang klase ng paliguan? Bagama’t ang paglagi sa isang ryokan ay isang magandang paraan upang lubusang makapag pahinga, pwede mo pa ring malasap ang karanasang ito kahit kulang ka sa oras. Sa gabay na ito, itinatampok ang 7 pangunahing onsen na bukas para sa mga bisitang hindi nangangailangan ng pananatili magdamag.
Kaya kung limitado man ang iyong oras o gusto mo lang subukan ang mga piling onsen sa loob ng isang araw, ang mga lugar na ito ay siguradong magbibigay sa iyo ng isang nakakapreskong at di-malilimutang karanasan.

1. Dai-ichi Takimotokan

Isa sa pinakamalaki at pinakatanyag na hot spring sa Noboribetsu Onsen, ang Dai-ichi Takimotokan ay kilala sa malawak nitong pasilidad at makasaysayang pinagmulan. Sa lugar na ito, maaari kang magbabad sa mainit na tubig mula sa pitong magkakaibang pinagmumulan ng hot spring.
Ang kabuuang sukat ng paliguan para sa kalalakihan at kababaihan ay humigit-kumulang 1,500 tsubo (tinatayang 4,950 metro kwadrado). Nagsimula ito sa malasakit ni Kinzo Takimoto, ang nagtatag ng ryokan, para sa kanyang asawang may sakit sa balat—isang pagmamalasakit na nagbigay-daan sa pag-unlad ng lugar.
Parang onsen amusement park ang pakiramdam sa loob, dahil mayroong sauna, steam bath, bubble bath, at walking bath. Hindi kailangan ng reservation para sa day-use, kaya pwedeng pumunta kahit biglaan.

2. Noboribetsu Sekisuitei

Ang pinakatampok na bahagi ng Noboribetsu Sekisuitei ay ang “Skyview Grand Bath” kung saan makikita ang malawak at nakama manghang tanawin ng kalikasan sa Hokkaido mula sa malalaking bintana. Kahit anong panahon ka bumisita, parang obra maestra ang tanawin.
Bukas ang day-use hot spring mula 11:00 AM hanggang 6:00 PM, at pwedeng magrenta ng tuwalya sa maliit na bayad. Para sa mga gustong mag-relax ng mas matagal, mayroon ding mga package na may kasamang pagkain—perpekto para sa kumpletong hot spring retreat.

3. Noboribetsu Grand Hotel

Ang Noboribetsu Grand Hotel ay isang kilalang onsen resort sa Hokkaido na tanyag dahil sa tatlong uri ng natural na mainit na bukal. Bukod sa kalidad ng tubig, hinahangaan din ang mala-Europeong disenyo at kaaya-ayang ambiance ng loob ng hotel. Pinakamabenta sa mga babae ang Dome-Shaped Roman Bath, isang Roman-style bathhouse na punong-puno ng kaginhawaan at elegansya. Dito, maari kang magbabad sa mainit na tubig habang nilalasap ang luwag at katahimikan ng paligid.
Sa labas, makikita mo ang isang napakagandang open-air bath na may mala-kahindik na talon — isang bihirang tanawin na tanging sa Noboribetsu Grand Hotel mo lamang mararanasan sa buong Noboribetsu. Lalo pang gumaganda ang tanawin tuwing taglagas dahil sa makukulay na dahon.

4. Noboribetsu Manseikaku Hotel

Para sa mga pamilyang may kasamang bata, ang Noboribetsu Manseikaku ay isang perpektong onsen hotel. May mga pasilidad ito tulad ng indoor pool, lugar para sa mga bata, karaoke rooms, at iba pa na siguradong magugustuhan ng buong pamilya. Meron ding mga “Kids Supporters” na laging handang tumulong upang maging ligtas at masaya ang karanasan ng inyong mga anak.
Siyempre, hindi rin magpapahuli ang kanilang mga onsen bath. Ang sikat na open-air bath ay mayroong gazebo kung saan maaari mong namnamin ang ganda ng kalikasan habang nakababad sa mainit na tubig — lalo na kapag nagbabago ang tanawin ayon sa apat na panahon.

5. Hotel Yumoto Noboribetsu

Ang Hotel Yumoto Noboribetsu ay isa sa mga pinakamahusay na onsen o hot spring hotel sa Noboribetsu, Hokkaido. Ang pangunahing atraksyon nito ay ang malawak na pampublikong paliguan kung saan maaaring maranasan ang tatlong uri ng natural na hot spring source at isang uri ng halo-halong tubig. Kahit ang sahig ng paliguan ay detalyado ang disenyo, na may sandstone upang likhain ang isang modernong espasyong may elegante at nakakarelaks na atmospera.
Tampok din ang open-air bath (rotenburo) na may dalawang klase—isa ay gawa sa kahoy na may natural na aroma, at isa naman ay rock bath. Ang rock bath ay bukas lamang tuwing tiyak na panahon, kaya inirerekomendang bumisita sa tamang season para masulit ito.

6. Kashoutei Hanaya

Ang Kashoutei Hanaya ay isang kaakit-akit na ryokan sa Noboribetsu na ipinagmamalaki ang 100% natural na onsen water na diretsong dumadaloy mula sa pinagmulan (gensen kakenagashi) at masasarap na pagkaing Hapon. Pwedeng mag-enjoy sa day-use onsen kahit walang reservation, kaya ito ay perpektong puntahan habang naglilibot.
Bukod dito, may yunohana (mineral deposits) sa tubig ng paliguan na kilala sa pagpapaganda ng balat at pagbibigay ng malalim na init na tumatagos sa katawan. Dahil ito ay isang maliit at tahimik na inn, maganda rin ito para sa mga magkasintahan o mag-asawang naghahanap ng romantikong bakasyon.

7. Yumoto Sagiriyu

Ang Yumoto Sagiriyu ay isang kilalang pasilidad sa Noboribetsu na nakatuon lamang sa day-use onsen, kung saan maaaring maligo at magpahinga kahit hindi ka mag-overnight. Taliwas sa mga tradisyonal na ryokan, ang Sagiriyu ay nagbibigay ng payak ngunit napaka-authentic na karanasan sa pampublikong paliguan ng Hapon. Ang malaking paliguan ay pinupuno ng natural na mainit na tubig mula sa pinagmulan, direkta at walang halong dagdag na proseso—isang lehitimong “gensen kakenagashi.”
Ang pinaka-kapansin-pansing tampok ng Sagiriyu ay ang kakaibang “Myoban-sen” (alum hot spring) na tanging dito mo lamang mararanasan. Kilala ito sa bansag na “Onsen para sa Mata” dahil sinasabing nakatutulong ito sa mga kondisyon gaya ng conjunctivitis. Kung nais mong maranasan ang isang kakaibang anyo ng pagpapagaling at relaxation, ito ang perpektong lugar para sa iyo.
Bagamat simple lamang ang pasilidad—mayroon lamang paliguan at maliit na silid-pahingahan—sakto ito para sa mga nais subukan ang tunay na Japanese hot spring sa abot-kayang halaga. Isa ito sa mga pinakamahusay na opsyon para sa mga day trip sa Noboribetsu.

◎ Buod

Ang Noboribetsu Onsen ay isa sa mga kilalang hot spring destinations sa Japan, dahil sa dami at iba-ibang uri ng mineral spring nito. Para sa mga biyaherong nais subukan ang maraming onsen nang hindi na kailangang mag-overnight, ang mga day-use onsen ay sobrang kapaki-pakinabang. Sa artikulong ito, pitong ganitong pasilidad ang ipinakilala, kabilang na ang di malilimutang karanasan sa Yumoto Sagiriyu. Huwag din palampasin ang pagbisita sa Noboribetsu Jigokudani (Hell Valley) at Oyunuma—mga likas na tanawin na para bang mula sa ibang mundo. Sa gitna ng kalikasan, damhin ang ginhawa at kagalingan ng mga onsen sa Noboribetsu.