4 na Dapat Puntahan sa Isla ng Minnajima, Okinawa

Mga 6 na kilometro sa kanluran ng Bayan ng Motobu sa gitna-hilagang bahagi ng Isla ng Okinawa, matatagpuan ang Minna Island—isang maliit ngunit kahanga-hangang isla na may hugis croissant, kaya tinatawag din itong “Croissant Island.”
Dahil sa bilis at dali ng pagpunta rito—humigit-kumulang 15 minutong biyahe sa high-speed ferry mula sa Motobu Peninsula—patok ito hindi lang sa mga turista kundi maging sa mga lokal. Isa ito sa mga pinakasikat na bakasyunan dahil sa napakalinaw at mala-esmeraldang tubig, mas malinaw pa kaysa sa mismong baybayin ng pangunahing isla ng Okinawa.
Taun-taon, lalong dumadami ang mga bumibisita sa Isla ng Minna dahil sa natatangi nitong kagandahan. Sa artikulong ito, ipakikilala namin ang 4 na inirerekomendang pasyalan sa Minna Island na siguradong magpapasaya sa iyong bakasyon sa Okinawa.

1. Minna Beach

Ang Minna Beach ang pinakasikat na destinasyon sa Minna Island—kilala sa kristal-linaw nitong tubig at makinis na puting buhangin. Dahil sa taas ng transparency ng dagat, makakakita ka agad ng makukulay na isda kahit konting silip lang sa ilalim ng tubig. Ang pino at malambot na buhangin ay ligtas at komportable para sa mga bata, kaya ideyal ito para sa mga pamilyang may maliliit na anak o sa mga magkasintahang nag hahanap ng romantic beach date.
May mga pasilidad sa isla para sa renta ng kagamitan sa marine sports—kaya madali mong ma-eenjoy ang snorkeling o diving. Kay linaw ng dagat dito na kahit 20 metro palayo ay kita pa rin ang ilalim, para kang napunta sa mundo ng mga sirena. Siguradong maaakit ka sa makukulay na coral reef at mga isdang naglalaro sa paligid.
Kompleto rin ang Minna Beach sa mga gamit—may paliguan, banyo, at tindahan. Pwede ka ring mag-barbecue sa tabing-dagat para sa mas masayang beach experience. Para sa mga gustong mag-relaks nang buong araw, inirerekomenda ang pag-upa ng log house. Dahil sikat ito sa mga lokal at turista, inaasahan ang dagsa ng tao lalo na sa peak season—kaya mainam na magpa-reserba agad ng high-speed ferry at mga aktibidad!

2. Minnajima Lighthouse (Parola ng Minnajima)

Matatagpuan ang Parola ng Minnajima mga 15 minutong lakad mula sa Minna Port. Itinayo ito upang magsilbing gabay sa mga barkong dumaraan sa pagitan ng Minnajima (Isla ng Minna) at Sesokojima (Isla ng Sesoko). Bagama’t hindi ito bukas sa publiko at hindi maaaring pasukin, isa itong nakatagong simbolo ng isla. Huwag kalimutang bisitahin habang naglalakad-lakad sa Minnajima—kapansin-pansin ang ganda ng puting parola na bumabagay sa bughaw na kalangitan.

Bagama’t ligtas ang mga baybaying bahagi ng isla, mag-ingat sa ilang bahagi ng pamayanan na may mga damuhang hindi pa naaayos. Dito raw madalas matagpuan ang habu—isang makamandag na ahas na likas sa Okinawa. Ang mga bahaging ito ay maaari mong madaanan sa pagpunta sa parola, kaya mag-ingat at maging maingat sa iyong paglalakad.

3. Kamome Rock Beach

Habang karamihan sa mga turista sa Minnajima Island ay dumidiretso sa sikat na Minnajima Beach, may isang tagong paraíso na tunay na sulit tuklasin—ang Kamome Rock Beach. Matatagpuan ito sa timog na bahagi ng isla at kailangang maglakad ng halos 30 minuto para marating, kaya bihira kang makakakita ng ibang turista rito.
Dahil sa lokasyon nito, para kang may sariling pribadong beach! Maaaring mong ma-enjoy nang solo ang kahanga-hangang dagat ng Okinawa.
Ang pangalan nitong “Kamome Rock” ay mula sa ibong dagat na tinatawag na “kamome” o tern. Sa tamang panahon, dumarating sila nang sama-sama para magparami, at maaari mo silang makita habang nagpapahinga sa batuhan. Kahit peak season, hindi ito matao—kaya swak ito para sa mga naghahanap ng tahimik at marangyang bakasyon. Rekomendado ito lalo na para sa mga mag kasintahan na gustong mag-date sa isang romantikong lugar.

4. Croissant Island

Ang Croissant Island ay isang kilalang tindahan ng pasalubong sa Isla ng Minnajima sa Okinawa at isa ring diving center para sa mga gustong sumubok ng scuba diving. Kilala ito sa kanilang mainit na pagtanggap at maalaga ngunit hindi nakakapresyur na serbisyo—perpekto para sa mga baguhang diver na nais sumubok sa ligtas at masayang paraan. Dahil sa magiliw na serbisyo, maraming turista ang bumabalik dito taon-taon.
Sa kanilang tindahan ng pasalubong, makakakita ka ng mga aksesorya na gawa sa tonbo-dama (glass dragonfly beads) at mga postcard na nagpapakita ng kagandahan ng kalikasan sa Minnajima—mainam na alaala ng iyong pagbisita.
Kinakailangan ang reserbasyon para sa diving, kaya’t magpareserba agad lalo na sa peak season.

◎ Buod

Ang Isla ng Minna ay isang maliit ngunit kahanga-hangang destinasyon sa Okinawa. Bagaman wala itong malalaking pasilidad tulad ng mga komersyal na kompleks o theme parks, ito ay lubos na pinupuntahan ng mga nais maranasan ang kalikasan sa pinaka-dalisay nitong anyo. Kilala ito sa malinaw na tubig-dagat na angkop para sa snorkeling at diving. Ang katahimikan at kasimplehan ng lugar ay nagbibigay ng isang marangya at di-malilimutang bakasyon. Madali rin itong puntahan mula sa pangunahing isla ng Okinawa, kaya’t mainam itong destinasyong idagdag sa iyong itinerary. Kung hanap mo ay kapayapaan at natural na ganda, Minna Island ay isang tunay na hiyas.