Ang Romantikong Kasaysayan at Lungsod ng Bulaklak: 5 na Nangungunang Destinasyon sa Lungsod ng Kani, Prepektura ng Gifu

Ang Lungsod ng Kani, ang sinilangan nina Akechi Mitsuhide at Mori Ranmaru—mga bantog na mandirigma ng panahon ng Sengoku—ay isang patutunguhan na puno ng kasaysayan. Sa lungsod, matatagpuan ang mga sinaunang libingan, labi ng mga kastilyo mula sa panahong Sengoku, at mga bakas ng sinaunang pugon, na tunay na makakaakit sa sinumang mahilig sa kasaysayan. Bukod dito, ang Flower Festival Commemorative Park, kung saan matatagpuan ang isa sa pinaka magandang hardin ng rosas sa mundo, ay nagbibigay ng perpektong lugar para sa isang kaaya-ayang paglalakad sa buong taon. Samantala, sa Kotobuki Mountain Trail, kung saan mararanasan mo ang nakama manghang tanawin ng kalikasan at malanghap ang sariwang hangin—isang perpektong destinasyon para sa mga mahilig sa panlabas na paglalakbay.

1. Gifu World Rose Garden: Isa sa Pinakamalaking Rose Gardens sa Mundo!

Ang Gifu World Rose Garden ay isang urban park ng prepektura na itinayo matapos ang "Flower Expo '95 Gifu" at kalaunan ay muling inayos ng Gifu Prefecture upang maging isang world-class rose garden. Sa lawak na katumbas ng 17 Nagoya Domes, ang parke ay tahanan ng mahigit 7,000 uri ng rosas (30,000 puno ng rosas). Dalawa sa pinakapinupuntahang bahagi ng parke ay ang "World Rose Garden" at ang "Rose Theme Garden", kung saan makikita ang iba't ibang uri ng old roses—mga rosas na malapit sa orihinal na wild species—at mga rosas na namumulaklak sa lahat ng apat na panahon: tagsibol, tag-init, at taglagas.

Bukod sa mga rosas, makikita rin sa loob ng parke ang iba't ibang uri ng bulaklak at halaman na nagbibigay kasiyahan sa mga bisita sa buong taon. Ang "Flower Earth Pavilion," isang malaking greenhouse, ay isang perpektong lugar upang maglakad-lakad at masiyahan sa luntiang tanawin anumang panahon. Huwag palampasin ang 45-metrong observation tower, kung saan makikita ang 360-degree panoramikong tanawin ng hardin, pati na rin ang Mt. Ontake at Central Alps. Ang tore ay idinisenyo upang mukhang isang barkong naglalayag sa dagat ng mga bulaklak, kaya't ang tanawin mula sa itaas ay tunay na kamangha-mangha.

Para sa mga mahilig sa pagkain, mayroong mga restaurant na naghahain ng lokal na pagkain mula sa Gifu Prefecture, kabilang ang isang Hida beef specialty store at isang theme garden café na may pink curry—isang kakaibang ulam na inspirasyon mula sa hardin ng rosas. Maaari ring subukan ang rose-flavored ice cream, isang natatanging paraan upang malasahan ang bango ng mga rosas. Para sa mga pamilyang may bata, subukan ang mga interactive workshops tulad ng pizza baking at paggawa ng "Hana-zushi" (sushi na may disenyo ng bulaklak)—isang paboritong aktibidad para sa mga bata.

Dahil sa magagandang bulaklak sa bawat panahon, masaya at makulay na kaganapan, at iba't ibang atraksyon, marami ang bumibili ng annual pass upang bumalik ng paulit-ulit. Ang parke ay madaling mararating sa pamamagitan ng bus o taxi (10 minuto) mula sa JR Kani Station o Meitetsu Shin-Kani Station.

2. Hatobuki Mountain Hiking Trail at Pahingahang Spa ng Yunohana Island Plaza

Ang Hatobuki Mountain, na may taas na 313 metro, ay may madaling hiking trail na perpekto para sa mga baguhan sa bundok at mga mahilig sa kalikasan. Mula sa isa sa apat na trailhead nito, ang Ōwaki Trailhead, mararating ang tuktok sa loob ng isang oras. May mga upuan at resting areas sa kahabaan ng daan, kaya pwedeng magpahinga habang paakyat. Bagaman may bahaging matarik, maayos ang daanan, kaya angkop ito kahit sa mga hindi sanay sa hiking.

Sa tuktok, matatanaw ang Komin Plain, at sa mga maaraw na araw, makikita pa ang Japanese Alps sa malayo. Tuwing Marso, namumulaklak ang katakuri flowers (dogtooth violet) sa isang malawak na bahagi malapit sa Katakuri Trailhead, na nagbibigay ng magagandang tanawin para sa mga nagha-hiking sa tagsibol.

Matapos ang pag-akyat, pwedeng mag-relaks at mag-recharge sa Yunohana Island Plaza, na malapit lamang sa Katakuri Trailhead.

Itinayo noong 2008, ang Yunohana Island Plaza ay isang sikat na spa destination sa Kani City. Kilala ito sa natural hot springs na bumubukal mula sa 1,800 metrong lalim, na may magandang tanawin ng ilog Kiso. Dito, maririnig ang agos ng tubig habang ninanamnam ang mainit na paliguan.

Ilan sa mga hot spring baths na pwedeng subukan ay ang Tsubo-buro (paliguan sa palayok) para sa personal na pagrerelaks, Carbonated hot spring bath na tumutulong sa pagdaloy ng dugo, at Silky bath na nagpapakinis ng balat.

Isa sa hindi dapat palampasin ay ang isa sa pinakamalaking stone spa sa Japan. May walong uri ng stone spa caves, kabilang ang Black Germanium at Radium Cave, na tumutulong sa detoxification at pagpapabuti ng metabolism.

Bukod sa hot springs, may relaxation lounge, manga at internet corner, at mga silid para sa pagpapahinga upang masulit ang wellness experience.

3. Kobuchi Dam Lake

Kung nais mong mas lubos na maranasan ang kalikasan ng Kani City pagkatapos mag-hiking sa Hatobuki Mountain Trail, huwag palampasin ang Kobuchi Dam Lake. Matatagpuan ito sa kahabaan ng Ilog Kukurigawa (bahagi ng Kiso River system) at ito ay nabuo sa pamamagitan ng Kobuchi Dam—ang kauna-unahang rockfill dam sa Japan. Ang rockfill dam ay isang uri ng dam na gawa sa tambak na mga bato at lupa, at ang pagtatayo nito sa Kobuchi Dam ang naging simula ng rockfill dam construction sa bansa.

Sa gitna ng lawa, matatagpuan ang Kobuchi Bridge, isang maliit na kahoy na hanging tulay, na nagbibigay ng magandang tanawin at perpektong lugar para sa pagkuha ng litrato.

Ang parke sa paligid ng dam ay isang sikat na destinasyon tuwing tagsibol, kung kailan namumulaklak ang mga cherry blossom, at sa taglagas, kung kailan naman nagiging makulay ang mga dahon ng puno. Mayroon din itong playground kaya’t perpekto para sa mga bata. Para sa mahilig mangisda, pwedeng magbayad ng bayad sa pangingisda upang subukan ang paghuli ng trout sa lawa, kaya’t ito ay isang magandang lugar para sa mga pamilya, bata, at matatanda upang mag-enjoy sa isang preskong outdoor na karanasan.

4. Balikan ang Panahon ng Sengoku! Tuklasin ang Makasaysayang Pook sa Kani City

Matatagpuan sa Kani City, ang Kaneyama Port Ruins (兼山湊跡) ay dating isang mahalagang pantalan sa Ilog Kiso. Dahil sa estratehikong lokasyon nito kung saan dumadaan ang Tōsandō road at Ilog Kiso, naging sentro ito ng kalakalan at paggalaw ng tao mula pa noong sinaunang panahon. Makikita pa rin sa lugar ang mga batong sahig ng pantalan at isang matandang ilawan (常夜灯), na nagpapatunay sa dating kasaganaan ng rehiyon.

Bukod sa ekonomiya, ang likas na bulubunduking anyo ng Kani ay ginawang perpektong lokasyon para sa estratehikong pagtatayo ng mga kastilyo. Isa na rito ang Akechi Castle (o kilala rin bilang Nagayama Castle), isang must-visit para sa mga mahilig sa kasaysayan.

Ang Kani City ay tanyag bilang lugar ng kapanganakan ni Akechi Mitsuhide, ang samuray na nagpatalsik kay Oda Nobunaga at nagbago sa kasaysayan ng Japan. Sinasabing mahigit 30 taon siyang namuhay sa rehiyong ito bago siya naging isang makapangyarihang heneral.

Sa kasalukuyan, ang Akechi Castle Ruins (明智城址) ay ginawang parke na may mga daanan para sa paglalakad, kaya madali itong bisitahin. Dito makikita ang "Senninzuka" (千人塚), isang libingan para sa mga nasawi nang bumagsak ang kastilyo, pati na rin ang "Six Relatives and Kin Spirits Tower" (六親眷族幽魂塔), na itinayo upang gunitain ang mga Akechi. Matapos ang Honnō-ji Incident, ang pamilya Akechi ay itinuturing na mga taksil, kaya ang kanilang mga alaala ay lihim na inilibing. Gayunpaman, natuklasan ang mga ito sa panahon ng paghuhukay sa kastilyo.

Madaling puntahan ang mga guho dahil ito ay 15 minutong lakad mula sa Meitetsu Akechi Station.

Malapit sa kastilyo, matatagpuan ang Tenryū-ji Temple, kung saan nakalagak ang pinakamalaking memorial tablet (ihai) ni Akechi Mitsuhide sa Japan at isang kahoy na estatwa ng heneral. Ang memorial tablet ay may sukat na 6 shaku 1 sun 3 bu (mga 184 cm) bilang simbolismo ng Hunyo 13, ang araw ng kanyang kamatayan. Taun-taon tuwing Hunyo, ginaganap ang isang seremonya bilang paggunita kay Mitsuhide, na dinarayo ng mga mahilig sa kasaysayan.

5. Sengoku Yamashiro Museum: A Historic Landmark and Cultural Treasure

Ang Sengoku Yamashiro Museum (dating Kaniyama Historical Folklore Museum) ay isang makasaysayang gusali na dating ginamit bilang paaralan. Itinayo noong 1885, ito ang isa sa pinakamatandang paaralan sa Japan na nananatili hanggang ngayon. Sumailalim ito sa restorasyon noong 1993, kung saan pinanatili ang orihinal nitong anyo. Ang gusali ay itinayo gamit ang natatanging “Kake Zukuri” na arkitektura, kung saan ang timog na bahagi ay may dalawang palapag habang ang hilagang bahagi ay may tatlong palapag—isang bihirang disenyo para sa isang paaralan. Dahil dito, itinuturing itong isang napakahalagang yamang pangkultura.

Sa loob ng museo, makikita ang mga personal na gamit at sulat ng mga kilalang makasaysayang pigura tulad nina Mori Yoshinari, ang unang puno ng Kanayama Castle, na ipinagkaloob sa kanya ni Oda Nobunaga. Kasama rin sa koleksyon ang mga kagamitan ni Mori Ranmaru, isa sa mga pinagkakatiwalaang tauhan ni Nobunaga.

Ang Kanayama Castle ay kilala rin bilang Kaniyama Castle—isang pagbabago sa pangalan ng lugar na naganap noong 1656. Pareho itong tumutukoy sa Kani City, Gifu Prefecture sa kasalukuyan. Ang Kanayama Castle Ruins, na idineklarang National Historic Site noong 2013, ay isang mainam na destinasyon pagkatapos bisitahin ang museo.

Bukod sa mga samurai artifacts, tampok din sa museo ang mga antigong bagay mula sa Panahon ng Meiji, kabilang ang mga lumang phonograph at isang fare chart mula sa Meitetsu Yaotsu Line, isang lumang linya ng tren. Dahil sa mga itinalagang yamang pangkultura ng lungsod at prepektura na makikita sa museo, isa itong perpektong destinasyon para sa mga mahilig sa kasaysayan ng Japan at kultura ng mga samurai.

◎ Tuklasin ang Kani City: Natatanging Yaman ng Kasaysayan, Tradisyon, at Kalikasan

Matatagpuan sa hangganan ng Gifu at Aichi Prefecture, ang Kani City ay patuloy na umuunlad bilang isang bedroom community ng Nagoya. Bagama't madalas na hindi napapansin, nagtataglay ito ng mga natatagong yaman ng pangkasaysayan na kahit ang ilang lokal ay hindi pa nadidiskubre. Dahil sa mayaman na kalikasan, perpekto ang lungsod na ito para sa mga naghahanap ng tahimik at nakakarelaks na bakasyon.

Para maranasan ang buhay na tradisyon ng Kani City, huwag palampasin ang kanilang mga natatanging pista. Ang Shirahige Shrine Grand Festival, isang mahalagang kultural na pamanang pangkalinangan, ay may kasaysayang nag-ugat sa panalangin sa tagumpay ni Taira no Sadamori. Tampok sa pagdiriwang ang kapanapanabik na yabusame (paligsahan ng archery habang nakasakay sa kabayo) sa isang 400-metrong landas ng dambana.

Kasama rin sa mga pinakaaabangang kaganapan ang Hyakumanben Machinagashi, isang ritwal mula pa noong panahong Edo, at ang kakaibang Cave Summer Festival, na ginaganap sa isang kweba na dating ginamit bilang isang pabrika noong digmaan. Dito nagtitipon ang mga lokal upang magpalamig sa init ng tag-araw.

Kung ikaw ay mahilig sa kasaysayan, kultura, at kalikasan, huwag palampasin ang pagkakataong tuklasin ang Kani City. Planuhin ang iyong paglalakbay at maranasan ang kakaibang kagandahan ng lugar na ito!