9 na Pinaka Magagandang Pasyalan sa Malacca – Lungsod ng Iba’t Ibang Kultura at Kasaysayan

Matatagpuan sa kanlurang baybayin ng Malay Peninsula, ang Malacca (Melaka) ay isang makasaysayang lungsod na sumikat bilang mahalagang sentro ng kalakalan sa pagitan ng Silangan at Kanluran. Nagsimula ito noong huling bahagi ng ika-14 na siglo sa ilalim ng Malacca Sultanate. Sa kabila ng pagkakasakop ng iba't ibang bansa tulad ng Portugal, Netherlands, Great Britain, at Japan, napayabong ng Malacca ang isang natatanging kultura na nagmumula sa pinagsamang impluwensya ng maraming lahi. Dahil dito, isinama ito sa listahan ng UNESCO World Heritage Sites noong 2008 bilang “Historic Cities of the Straits of Malacca: Melaka and George Town.”

Narito ang 9 inirerekomendang pasyalan na dapat mong makita sa makulay at multikultural na lungsod ng Malacca.

1. Dutch Square (Red Square)

Ang Dutch Square o tinatawag ding Red Square, ay napapalibutan ng mga makasaysayang gusaling kulay pula ang ladrilyo at isa sa mga pinakasikat na pasyalan sa Melaka, Malaysia. Laging matao ito ng mga turista mula sa iba’t ibang panig ng mundo.
Tampok sa gitna ng plaza ang Christ Church Melaka, isang makasaysayang simbahan na kilala sa kakaibang pulang pader nito. Sa paligid ng plaza, matatagpuan din ang mga makasaysayang gusali gaya ng Stadthuys—ang dating tahanan ng mga gobernador ng Olanda—isang orasan sa tore, at lumang fountain, na nagpapakita ng kolonyal na kasaysayan ng lungsod.
Sikat din dito ang mga makukulay na trishaw o tatlong-gulong na bisikleta na may palamuti at musika. Isa itong masayang paraan para libutin ang mga kalapit na atraksyon. Huwag kalimutan na kumuha ng litrato, dahil maraming magandang lugar sa paligid na perpekto sa Instagram!

2. The Stadthuys

Itinayo noong 1650 matapos ang pananakop ng mga Olandes mula sa mga Portuges, ang Stadthuys ay kinikilalang pinakamatandang gusaling Olandes sa buong Asya. Dati itong nagsilbing tanggapan ng pamahalaang kolonyal ng Olanda at tirahan ng kanilang gobernador sa Melaka. Makikita sa disenyo nito ang tipikal na arkitekturang kolonyal ng Olanda.
Simula noong 1982, naging bahagi ito ng Melaka History and Ethnography Museum at binuksan sa publiko. Sa loob ng museo, matutunghayan ang kasaysayan ng lungsod—mula sa pagkakatatag ng Malacca Sultanate noong 1396, hanggang sa mga panahon ng pananakop ng mga Portuges, Olandes, Ingles, at Hapon. Kung nais mong mas makilala ang makulay na kasaysayan ng Melaka, ito ang perpekto na destinasyon para sa iyo.

3. Simbahan ng St. Paul

Ang Simbahan ng St. Paul ay isang makasaysayang simbahan ng Katoliko na itinayo noong 1521 sa panahon ng pananakop ng mga Portuges. Matatagpuan ito sa tuktok ng burol ng St. Paul, na maaabot sa pamamagitan ng banayad na pag-akyat. Nagsilbi itong mahalagang sentro para sa pagpapalaganap ng Kristiyanismo sa Asya, lalo na sa Malacca.
Isa sa mga kilalang personalidad na bumisita dito ay si San Francisco Xavier, isang misyonerong Jesuita. Sa loob ng simbahan ay matatagpuan ang isang malaking estrukturang bato na nagsilbing pansamantalang himlayan ng kanyang mga labi sa loob ng siyam na buwan matapos siyang bawian ng buhay dahil sa lagnat, bago ito inilipat patungong Goa, India.
Sa harap ng simbahan ay nakatayo ang rebulto ni San Francisco Xavier, bilang paggunita sa kanyang mahalagang misyon. Mula sa tuktok ng burol, matatanaw ang kahanga-hangang tanawin ng lungsod ng Malacca — perpekto para sa mga mahilig sa kasaysayan at kalikasan.

4. Kuta ng A Famosa / Porta de Santiago

Sa dami ng makasaysayang pook sa Malacca, ang Kuta ng A Famosa o Porta de Santiago ang itinuturing na isa sa mga pinakaimportanteng labi ng kasaysayan. Itinayo ito noong 1511 ng mga Portuges matapos nilang sakupin ang Kaharian ng Malacca. Isa ito sa mga pinakamatandang European na estrukturang nananatili sa Timog-Silangang Asya.
Nakakagulat na sa panahon ng pagtatayo nito mahigit 500 taon na ang nakalilipas, ang lokasyong ito ay nasa dagat pa. Orihinal na may apat na pintuang-bayan ang kuta, ngunit isa na lamang ang natitirang nakatayo ngayon — ang Porta de Santiago. Sa kabila ng panahon at pagbabago, nananatili itong patunay sa makasaysayang laban at kahalagahan ng Malacca sa rehiyon.
Tuklasin ang natatanging lugar na ito at damhin ang kasaysayan habang pinagmamasdan ang natitirang pinto ng kuta.

5. Malacca Sultanate Palace

Ang Malacca Sultanate Palace ay isang kahanga-hangang kahoy na replika ng orihinal na palasyo ng unang hari ng Sultanato ng Malacca, na muling itinayo batay sa mga lumang dokumento. Itinayo ito gamit ang tradisyunal na teknik na wood joinery—isang paraan ng pagtatayo ng walang ginagamit na kahit isang pako. Ang tatlong palapag na palasyong ito ay isa sa mga pinaka-kapansin-pansing destinasyon sa Malacca.
Sa loob nito matatagpuan ang Museo ng Kultura ng Malacca, kung saan makikita ang makasaysayang eksibisyon na naglalarawan ng buhay noong panahon ng Sultanato, pati na rin ang makukulay na kasuotan mula sa iba't ibang rehiyon ng Malaysia. Para sa mga mahilig sa kasaysayan at kultura, sulit itong pasyalan. Huwag kalimutan na libutin ang magandang hardin ng palasyo na paborito rin ng mga turista.

6. Jonker Street

Kapag pinag-usapan ang pinaka-masiglang kalye sa Malacca, ang Jonker Street (Jalan Hang Jebat) ang nangunguna. Matatagpuan sa gitna ng Chinatown, ang 500-metrong kalsadang ito ay puno ng mga tindahan ng antigong gamit, tindahan ng mga pasalubong, boutiques, at mga lokal na kainan. Laging puno ng mga turista at lokal, ito ay isa sa pinaka popular na pasyalan sa lungsod.
Bagama’t masaya itong bisitahin sa araw o gabi, ang weekend night market tuwing Biyernes, Sabado, at Linggo ang pinaka-rekomendado. Simula alas-6 ng gabi hanggang hatinggabi, nagiging pedestrian zone ito at napupuno ng makukulay na food stalls at tindahan ng lokal na produkto. Damhin ang kasiglahan ng komunidad ng mga Tsinong Malay at tuklasin ang mas modernong bahagi ng Malacca.

7. Baba-Nyonya Heritage Museum (Museo ng Baba-Nyonya）

Matatagpuan sa Chinatown ng Malacca sa Heeren Street—na kilala rin bilang “Millionaire’s Row”—ang Baba-Nyonya Heritage Museum, isang dating mansyon ng isang mayamang pamilyang Tsino-Malay na yumaman sa kalakalan sa Melaka. Ang Baba-Nyonya ay tumutukoy sa mga inapo ng mga lalaking Tsino at babaeng Malay, na tinatawag ding Peranakan. Bahagi ng kanilang bahay ay binuksan sa publiko bilang museo upang maipakita ang kanilang makulay na kultura at pamumuhay.
Bago ito ginawang museo noong 1985, ang mansyon ay tirahan ng pamilyang Chan sa loob ng apat na henerasyon. Ipinagmamalaki ng bahay ang marangyang disenyo at makasaysayang kasangkapan na tunay na kahanga-hanga. Mainam itong bisitahin para masilayan ang tradisyon at kulturang Peranakan na kakaiba at makabuluhan.

8. Cheng Hoon Teng Chinese Temple

Itinayo noong 1646, ang Cheng Hoon Teng Chinese Temple o kilala rin bilang Qing Yun Ting, ay itinuturing na pinakamatandang templong Tsino sa buong Malaysia. Itinayo ito bilang pagkilala sa kontribusyon ni Admiral Zheng He, na namuno sa mga ekspedisyon ng Ming Dynasty patungong Malacca. Ang templo ay kilala sa matingkad nitong kulay pula at makukulay na dekorasyong tradisyonal, na umaakit sa mga lokal at banyagang turista.
Gamit ang mga materyales na inaangkat mula sa Tsina at itinayo alinsunod sa mga prinsipyo ng feng shui, ang Cheng Hoon Teng ay hindi lamang isang makasaysayang pook kundi isang banal na lugar din ng panalangin. Maaaring magsindi ng insenso at magdasal sa loob ng templo. Sa paligid nito, makikita rin ang mga moske ng Islam at iba pang mga templo, kaya’t mainam itong bisitahin bilang bahagi ng kultural na pag byahe sa Melaka.

9. Masjid Selat Melaka (Melaka Straits Mosque)

Matatagpuan ang Masjid Selat Melaka, o kilala rin bilang Waterfront Mosque, sa Melaka Island na nasa humigit-kumulang 10 minutong biyahe mula sa sentro ng lungsod ng Melaka. Tinawag itong “Waterfront” dahil kapag high tide ay tila lumulutang ito sa dagat. Hindi ito madalas na nababanggit sa mga guidebook kaya't isa itong tunay na tagong yaman ng Melaka.
Kapansin-pansin ang dilaw na dome ng moske, at bukas ito sa mga bisita maliban sa mga oras ng pagdarasal. May nakapalibot na deck ang paligid ng moske kung saan pwedeng pagmasdan nang malapitan ang Malacca Strait. Kahit hindi pumasok sa loob, sapat na ang tanawin sa labas upang mamangha.
Ang pinakaaabangang bahagi ng pagbisita rito ay ang paglubog ng araw sa Malacca Strait, na sinasabing isa sa “Tatlong Pinakamagandang Sunset sa Mundo.” Napakagandang panoorin ng takipsilim, at kapag lubog na ang araw, lumiliwanag ang paligid na mas nagpapaganda sa romantikong ambiance. Kung may pupuntahan ka sa Melaka, siguraduhin na kabilang sa itineraryo ang Masjid Selat Melaka.

◎ Buod

Ang Malacca ay isang kahanga-hangang destinasyon kung saan masisilayan mo ang kasaysayan at iba’t ibang kultura mula sa buong mundo. Mula sa Dutch Square na nagsisilbing sentro ng turismo, maraming magagandang pasyalan sa paligid na maaaring tuklasin sa pamamagitan ng paglalakad o pagsakay sa tradisyonal na trishaw. Bukod dito, maraming photo spots at tanawin na perpekto para sa mga kuhaing ala-Instagram. Huwag kalimutang ihanda ang iyong kamera kapag bumisita ka sa makasaysayang lungsod na ito!